Ad Balthassarrem Odeschalchium... Iliadis Latino carmine vertendae auctorem atque auspicem
Magnanime hortator vatum ductorque, tuis qui
Clam populo carmen lusimus in laribus;
Quo nunc me horrentem fluctus mergique timentem
Parva iubes vasto pandere vela mari;
5
Immensa et valida sulcat qui caerula puppi
Pone sequi lembo Maeonidam exiguo?
Nil tibi ego possum, Balthassar Magne negare
Quem toto admirans pectore suspicio
Atque colo eximiis clarum virtutibus, artes
10
Complexum doctae Palladis omnigenas,
Musarumque artes varias comemque bonumque
Accessu et facilem, suavis et alloquii
Haud parcum. Vtque brevi dicam simul omnia dicto
Patrique et matri moribus assimilem.
15
Quos, verum cupiam si ponere nomen utrique
Vrbis iure queam dicere delicias.
Feminei hanc generis rarum decus, hunc decus ingens
Iactat queis sese Romula terra virum.
Conspicuos proavum claro fulgore suorum
20
Ambo luce sua, sed mage conspicuos.
Exemplar gnatum geminum virtutis avitae
Quod tu avida inspectum mente oculosque refers.
Haec tibi ego propter dulci devinctus amore,
Quid ni me praestem morigerum et docilem;
25
Ac subeam iussis duri quodcumque laboris
Vel si me pennis carpere praepetibus,
Aeriosque velis tractus et nubila caeli
Tentantem Icarias sidera ad alta vias?
Te tamen est aequum tam duris parcere iussis
30
Nec velle id, vates quod tuus, ingenium
Omne licet promam solers atque impiger omnes
Contendam nervos, efficere haud valeam.
Vt certe haud valeo quod mandas, dia Latinis
Maeonidae magni carmina carminibus
35
Vertere sic vates summo ut contendere vati
Ardore ac pulchris haud dubitem numeris.
Nec malus interpres faciam fecere quod olim
Multi qui dictis omnia frigidulis
Complentes verbum verbo sunt reddere tantum
40
Conati atque meram barbariem attulerunt,
Pro cultu obscuras , pura pro luce tenebras
Stridorem cantu pro liquido horrisonum
Sic, iure irasci vatum ut queat optimus ille
Si gressum Elysiis huc ferat e domibus.
45
Et Venerem adspiciat sese omni omnique lepore
Exutum et Grai floribus eloquii,
Horrentem foede balbumque et verba sonantem
Vilia quae spernat vel puer e trivio.
Mirari possint soli queis nulla vetustas
50
Nulla et inest fatuo in pectore mica salis.
Littterulas docti venari nilque pusillum
Negligere, obliti, tot bona Maeonides
Queis valet ac mira complet dulcedine mentes
Iamque flexanimo carmine corda subit.
55
His tu me similem non vis, nec verba Latine
Sola iubes cultum vatis et eximii
Exprimere ingentesque animos sacrumque furorem.
Verum id quam durum sit, reor, ipse vides;
Quamque alias vires nervosque in carmine poscat
60
Quam mihi Castaliae quos tribuere deae.
Quippe etenim, ut rebus, lingua sic praestat Homerus
Verbaque mirifice , mirifice numeros
Contribuens formas pulchri se vertit in omnes
Qualis qui Nerei per vada salsa gregem
65
Caeruleum pascit Proteus et nunc fluit undae
Assimilis flammas nunc abit in rapidas.
Nam modo foedatus fertur, velut amnis in alveo
Ingenti sese cum tacito evoluit
Ingentem cursu placidus ripamque virentem
70
Illimi tardus lambere gaudet aqua.
Hinc atque hinc teneras errant armenta per herbas
Et Zephyri arboreas vix ciet aura comas.
In medio late sternit se vitreus humor
Inque udis ludunt Naiades thalamis.
75
Sic vates leni fundit se carmine, mentes
Et blando illectas irrigat eloquio.
Nunc ruit, idem auctus multo velut imbre, soluta
Et nive, mugitu cum fremit horrisono;
Et ripam super exundat molesque superbus
80
Proruit, eversis amnis et aggeribus
It campo spumansque tumensque et pinguia culta
Turbidus immani diluit eluvie;
Et nemora et collles annoso robore silvas
Contorquet rapidis in mare vorticibus.
85
Iamque greges tulit et pastorum agrestia saepta
Flent moesti attonitis mentibus agricolae,
Et pavidi fugere micanti pectore Fauni
Atque altis abdunt se Dryades latebris.
Talis. Talem aio? Multo pol grandior ille
90
Amplior et multo viribus et validis
Auctior, exultatque fremens et corda legentum
Miscetque et variis turbat agens numeris,
Ac partes raptans quo vult contorquet in omnes.
Me certe Phoebo tactus ut incaluit
95
Praesenti vates divini et pectoris alto
Exprompsit carmen grandiloquum ex adyto;
Sic agit attonitumque animi sibi vindicat, aures,
Sic mi concentu complet Apollineo.
Sic mi omnes alto miscet sub pectore sensus
100
Cuncta mihi ut videar non legere, ast oculis
Vsurpare ipsis manifesta in luce diei.
Bellantum in densos abripior cuneos
Ardet ubi saevus medio in certamine Mavors
Atque virum atque alti cornipedum fremitus
105
Et galeae Clypeique horrendum et tela fragorem
Dant late nigro in pulvere semianimes.
Flos iuvenum, duro confossi pectore ab aere
Languidulo extremos ore cient gemitus.
It multo largus passim de vulnere sanguis
110
Purpureo et subter flumine terrra madet.
Seu Troum furit in turmas acer Diomedes
Palladiae et divum numina fretus ope
Haud dubitat saevisque minax incessere dictis
Atque hasta impavidus figere vulnifica;
115
Sive aciem rapit in Danaos male turbidus Hector
Vrere deprensas et parat igne rates
Spem reditus dulcem iniectis et perdere flammis
In nocte Argivam fumifera et sobolem
Mactare extremum iam ponti ad litus adactam
120
Incertam rerum consiliique inopem
Et Iovis adversi pulsam domitamque flagello
Aiax ni magnus praesidio subeat
Fortiaque adversis opponens pectora telis
Extremum sociis arceat exitium;
125
Seu Phrygiam Xanthi pubem conturbat in alveo
Fulmineoque virum milia multa neci
Dat ferro Aeacides trepidoque et rauca frementi
Praepedit aggesta caede vias fluvio.
Virque deum toto supra caput impendentem
130
Amne celer campo sustinet in viridi;
Excitus Aetneo ripas dum corripit igni
Atque nemus flammis Mulciber involuit
Circum omne ac tumidum vesano gurgite flumen
Sistitque in mediis et ferus urit aquis.
135
Victor at exultans animis ingentibus heros
Versa fuga curru proterit aerisono.
Corpora cornipedumque virumque ac turribus ardet
Sub Phrygiis leto sternere Priamiden
Invisum saeva Patrocli caede madentem
140
Quem muris miserum prospicit e patriis
Infelix genitor visuque exterrita mater
Heu volvi foedo in pulvere seminecem.
Heu celeri extinctum raptari ad litora curru
Attoniti, et scissis vestibus exululant.
145
Canitiem et manibus foedant , circum omnia planctu
Femineo atque virum questubus anxiferis
Insonuere, alto ceu si de culmine Troia
Igni usta extremos corruat in cineres.
Agmina quid Graium variis cum fortia ludis
150
Iusta ubi Patroclo reddita sunt, hilarat?
Atque inter sese committit prima virorum
Caestu, arcu, lucta cursibus et rapidis?
Fulmineaque hasta vesani et pondere disci
Ferre avidos magno munus ab Aecida?
155
Quid coetu in populi cum suscitat alta sonantem
Nunc Laertiadem, grandiloquum, Pylium
Nestora nunc placido cui se vox fundit ab ore
Et melle et dulci dulcior ambrosia?
Quid cum alto vates infert se magnus Olympo
160
Et divum haud dubitat pingere concilia?
Iuppiter in medio sedet arduus omnipotenti
Nutu orbem et genitor concutit astriferum.
Et maria et terras omnes altique profundam
Noctem Erebi, fantem caelicolae attoniti
165
Mirantur, gelido perculsi corda pavore,
Augusto ille minas intonat ore minas:
Divum audax quicumque suo sine numine Troum
Gentem, vel gentem iuverit Argolicam
Deiecturum infra Titanas Tartara in ima
170
Supremo caeli e vertice praecipitem,
Horret ubi obscuro longe depressior Orco
Immani carcer ferreus in barathro.
Haec ut ego aggrediar versu tentare Latino?
Haec ut ego possim vertere sic, facies
175
Rerum aeque ut maneat clara et manifesta, colorem
Quidque suum et servet, mentem animi et penitam
Illabens, aeque capiat teneatque legentem
Cantu et Museis implicitum illecebris?
Id nec ego, quisquam nec possit, ni pater alta
180
Ipse virum Phoebus Pegasidum in nemora
Ducat et Aonii supremo in vertice montis
Tingere Hyantheo labra sinat latice
Fontibus ex isdem, multo se proluit amni
Vnde sacer vena e divite Maeonides.
185
Hoc sibi sed nemo speret, quod Musa Maroni
Divinam ut Latio conderet Aeneida
Posse dedit soli, potu dignatus eodem,
Carminis ut summa par quoque laude foret.
Salve magne Maro, vatem exaequare parentem
190
Cui dedit heroa Calliopea tuba;
Quem docuit solum numerosque et verba referri
Queis posset pulchri Graecia quicquid habet.
Salve iterum vates et vatum pater unus Homerum
Tu poteras dignis vertere carminibus
195
Atque sui similem Romano ostendere cultu.
Id quando haud placuit, verba mihi ac numeros
Vimque tuam et clarum clara mage luce nitorem
Suffice; si cultor te tuus a puero
Dilexi multis vatum prae milibus unum,
200
Si tua pervigili scripta lego studio;
Aurea si cupido tua dicta in pectore condo
Oblito ne quid defluat ex animo.
Audior, an spernit vates mea grandia vota?
Audior: en votis annuit illle meis.
205
Balthassar, renuo iam nil tentare pericli
Nec metus est vires ne grave frangat onus.
Hic mihi si facilem det sese ac praebeat omnes
Linguae quas docto in carmine condit opes
Vt Iuno captum forma sopire Tonantem
210
Vellet in Idaeis cum dea verticibus,
Blanditias mollesque iocos omnesque poposcit
Verborum Idaliam delicias Venerem.
Illa ubi cuncta inerant, ceston dedit. Haec ubi coepit
Continuo aethereis digrediens domibus
215
Inque Idam venit, praestanti et munere compos
Difficilis facta est, haud mora, propositi.
Sic mihi Mantous sua det si philtra poeta
Linguae cultus ubi mirus inest, lepidi
Verborum et flores aurique et mentibus apti
220
Concentus; philtra haec, ni modo defuerint,
Mens quod avet mandas quod tu mihi dulcis amice
Quod pote vix fieri forsitan efficiam.
Felicemque operis functum et mea munera pulchre
Fors erit ut tu aliquo captus amore legas;
225
Tuque tuus tecum et frater, spes altera magnae
Magna domus, fratrem dicere proh superi.
Cogor enim, geminos licuit nec dicere fratres,
Vt volui infelix, dicere ut institeram.
Quippe alter fratrum, tristi haec dum scripsimus ipsa
230
Ereptus fato, proh dolor occubuit.
Et caros luctu necopina morte parentes
Germanos luctu et perdidit unanimos,
Et fidum attonitae perculsa mente sorori
Obruit immensa pectus amaritie.
235
Queis mite ingenium iuvenis formaeque leporem
Et verba Hyblaeo dulcia melle magis,
Doctrina et cultum pectus mentemque sagacem
Suetam et res miro expendere iudicio
Innocuum et vitae constanti lege tenorem
240
Virtutisque ardens eximiae studium,
Dignaque tot bene dicta omni bene factaque laude
Res nulla oblito diluet ex animo,
Quin desiderio fixa acri in flore iuventae
Extinctum leto nocte dieque vocent.
245
Extinctum leto? Vesano haec ille dolori
Ignoscat felix tristia verba precor.
Extinctum nec enim leto est fas dicere, dulci
Compositum somno sustulit astriferas
Quem Divum ad sedes Virtus celsoque locavit
250
Ipsa novum gaudens caelicolam in solio;
Regnat ubi fruiturque sua iam forte procellas
Nec tristes metuit, nec mare navifragum
Vitae haec quo miseri iactamur nocte sub atra
Insanis acti per vada turbinibus.
255
Aequius est nostro quos certe horrere periclo
Illi quam fletus fundere luctificos,
Qui tenuit portum tuta et statione receptus
Aeternae gaudet gaudia laetitiae.
Parcite iam lacrimis, clamo, nec tristia moesto
260
Quis fletu faxit funera caelicolae.
Clamo iterum, lacrimis non fas violare beatum.
Est iuvenum caeli quem tenet alta domus.
Pulchrior et melior cui parta est vita, suprema
Rursum nascuntur luce, boni, haud pereunt.
265
Hactenus haec, dulci nimium provectus amore
Nunc magnum accingor vertere Maeonidam.
En age, iam da lora: feror quo mittis et audax
Vt res cumque cadet, iussum opus aggredior.